London beibí!!!

Jæja öllsömul!
Þá höfum við bæst í hóp virkra heimsálfa, lögðum í morgun land undir fót og flugum til hinnar miklu heimsborgar, London. Ferðin byrjaði ágætlega, allavega þegar tárvotar kveðjustundir voru afstaðnar á Keflavíkurflugvelli. Við komumst klakklaust með lest inní borgina og þræddum svo neðanjarðarlestirnar eins og við hefðum aldrei gert annað. Takmarkið var að komast heim til hennar Freyju á 14 Pembroke Road en þar fáum við að gista.
Þar sem Snædís hafði aldrei áður komið til London kom ekki annað til greina en að nýta dagspassann í undergroundið og drífa okkur að sjá Stóra Ben. Hann sáum við og bættum um betur þegar við drifum okkur inn í Parliamentið og hlustuðum á House of Commons ræða einhvers konar heilbrigðislöggjöf. Sem voru viss vonbrigði þar sem að konan sem tók á móti okkur við innganginn sagði að þeir ætluðu að ræða margumtalaða hryðjuverkalöggjöf. En húsið er fallegt og gamalt. Svo sátum við á bekk við Thames og borðuðum hnetur úr plastglasi og drukkum vont flöskuvatn.
Nú er kominn háttatími hjá okkur, enda svefn mikilvægur, sérstaklega þar sem við munum ekki sofa vel næstu nótt. Þá verðum við nefnilega í háloftunum á leið til Delhi.
Okkur líður vel og erum mestmegnis glaðar með lífið.
Knús á alla heima
Matta, Snædís og Stella Rún